澳大利亚新闻网 - 澳大利亚新闻 - 澳大利亚中国新闻门户 | Australia Chinese News Portal

 找回密码

搜索
ACNW QR CODE
ACNW WECHAT QR CODE

阿婆讲上海老城区沪语

2019-7-20 11:02| 发布者: yan | 评论: 0 |来自: SAS中文论坛

导读: 今天已很少听到这么原汁原味的老城区上海话了。一位上世纪30年代出生的上海女人,讲述她的一辈子。人活一辈子,也许就应该多看淡一些。一生看着漫长,实际短暂,有些不必纠结。

吴语全文

我叫闵蕙君,我是1931年2月份(出生嗰)。小辰光条件还是可以嗰,当时呢蹲在南市区大东门,第个辰光房子呢是老式房子,佣人么总归10个多眼,呵呵。箇一张照片么我总归是7岁嗰辰光,箇辰光呢我祖父嗰钱庄还开在许。箇下头是一只柜台,上头是第个铁栅栏。打样以后呢,喊我坐在箇地方拍一张。箇从前也是着旗袍嗰,当时辰光呢屋里还请一个裁缝,所以第个辰光赛过裁缝师傅养在屋里向嗰。箇张就是6、7岁辰光,嘞啦南市(第个)蓬莱公园拍嗰,就是阿拉姆妈带我搭弟弟到(第个)蓬莱公园拍嗰,长袜子再着皮鞋伐,热天总归着箇种跳舞裙子嗰呀。箇一张物事呢拍得蛮滑稽嗰,清清爽爽是我父亲拍嗰。乃末三个人么侪是三只怪面孔,乃末后来阿拉爷拿到第个照相馆去印第个底片,照相馆呢第个辰光要出两块洋钿问阿拉父亲买箇张底片。乃末阿拉父亲讲:“小姑娘照片哪能好买畀㑚,弗卖!”1937年,大概是“八一三”以后就第爿钱庄就关脱了。阿拉屋里向全部逃难逃到从前嗰法租界,就是现在嗰复兴中路,从前叫拉斐德路。搭前头弗好比了,阿是啊,所以整个屋里向呢就害在日本人手里向。第个家境也一落千丈,就是箇能。高中以后么,阿拉姆妈托我姨夫,渠是银行里向总经理,乃末(我)就光中银行做吇三年。我到第个光中银行呢是47年7月7号,第个赵积善是47年嗰7月3号,渠比我先进4日天,我讲。乃末一直到49年,渠约我看看电影啊、喫喫点心啊、喫喫饭啊箇能再谈起来嗰。我看第个老赵呢渠也是任劳任怨嗰,一方面也平常么经常看看书咾啥,伊歇帮银行(弗晓得㑚晓得伐)开本票咾啥,喔哟渠开起本票来又快又好。乃末有交关事体呢有种人有眼弗大肯多做嗰,渠做了蛮巴结嗰。乃末渠所以搭我有所表示么,我觉着倒还是可以嗰。49年谈了弗长就交换照片。好像渠先畀我照片,乃末我也畀渠张照片。所以姆妈后来看著人咾啥渠讲:“还是积善好看,侬弗好看。”结婚照么我就是拍了一个普通嗰照片呀,婚纱嘸沒拍,因为第个辰光呢有种人拍有种人弗拍,老赵么听单位里讲咾啥意思赛过最好弗着婚纱咾啥,乃末阿拉就箇能普通照片拍吇一眼。50年交关银行侪弗景气侪关脱了,乃末阿拉第个银行也关脱了。就是嘸沒工作啦。我嗰亲眷,渠嗰同学屋里向开了第个鸿运来照相馆,却一个营业员,乃末我去了。我去工作了两个月。我嘞啦照相馆辰光呢,一个摄影师讲,闵小姐我搭侬拍两张照片,箇末好嗰呀,就拍了几张。后来我到了人民银行,人家讲延安路承德路,“箇照相馆里闵蕙君啊有侬照片嘛,”搭我讲。我讲我倒弗晓得,乃末我后来倒也再过去看看,果然是有,放来大眼哦,弗是介小,放了大概两张,呵呵。摆在许也是做做广告箇种性质。我就是最后着旗袍就是箇张照片。箇末是54年拍嗰。就是我堂阿姐结婚阿拉去喫酒。平常上班弗着旗袍,弗好着嗰,着吇弗像腔了。54年辰光呢粮食计划供应了,乃末拿我从人民银行调出,调到粮食部门,上海调大概调5个人,女同志只有我一家头。59年么,干部上山下乡,乃末我又派到崇明劳动一年。60年再回到上海市粮食公司,86年退休后头我还做唻,在徐镇街道三产做了11年,第个辰光我已经69岁了,我想我也做了够了。所以我一塌括啦前后从18岁开始做做到69岁。有尝我讲了,近嗰事体反而忘记脱,种老事体是伐往往有尝是想得起来嗰,特别是小辰光嗰事体哦,譬方讲我看到我姆妈照片咾啥,我就想阿拉姆妈真嗰也是蛮好嗰。乃已经是也过世50年也多了,总归有眼感触嗰。有交关人侪老早伊嗰(去了),诺,阿拉女儿讲:“姆妈侬总归蛮乐观嗰。”我是箇能想想,交关事体一撇就撇开了,有啥想弗开呢,侬讲对伐。

相关阅读

热门新闻 Hot
关闭

友情推荐上一条 /2 下一条

手机版|Archiver| 澳洲新闻在线  

Copyright © 2012 - 2020 | All Rights Reserved.

Powered by Website Design Sydney

返回顶部